Aγyul iεebban taḍuṭ d uγyul iεebban lmelḥ (taneqqist) - Jean de la Fontaine (T. Lounès Amziane)

Aγyul iεebban taḍuṭ d uγyul iεebban lmelḥ

Yella zik yiwen n urgaz
Yetteddu am ugellid
Mi akken id-yenher s uεekkaz
Sin n yeγyal deg webrid

Yiwen di tikli iγawel,
Ishel-as webrid, yuzzel

Imi d taḍuṭ i iεebba
Wayeḍ idda kan s leεqel;
Di tikli iḥwağ aḥellel;
Yewwi lmelḥ γef tbarda

Ddan acḥal deg yiberdan;
Ulin acḥal d tiγalin;
Zegren aṭas n yiγezṛan
Suggten tikli ayen din.

Akken armi wwḍen s asif,
Tiqenṭert akken a^d tt-zegren.
Xuylen, dγa bedden di rrif,
Ugin ad aẓen iḍaṛṛen.

Argaz-nni yetεeğğeb;
Yal ass syin i zegger.
Ґef wi iwwin taḍuṭ, yerkeb
Ma d wayeḍ zdat-s i t-yenher.

Aγyul yeddan γer zdat,
Yebγa ad yexdem rray-is:
Mi ixulef abrid yeğğa-t,
Di lkaf yewḥel uḍar-is.

Islek-d iman-is, yerwel,
Yeṭṭef abrid, yezger weḥd-s.
Skud yettaẓ γer daxel,
Taεkemt iεebba tneqqes.

Din kan lmelḥ akk yefsi,
Aman deg-s mi ttawin.
Ttεebga n weγyul tefsusi;
Tuyat-is d tilmawin.

Amdakel-is mi d-yettwali,
Yettu acu εebbant tuyat.
Ґer γur-s id-yewwi tikli,
Yenwa abrid n ṣṣeḥ yufa-t.
Teḍra-as am uḥuli
Yefkan azuγer γer zdat.

Yenwa ad izger s laman.
Yuzzel, yengez γer waman
S ttεebga d win tt-irekben.
Ur yebni γef taḍuṭ yeswan.
Weḥlen deg yiwen n lawan;
Deg yiwet n tegnit raben.

Aγyul yettwaxneq, yezder.
S ttεebga iwḥel deg wasif.
Ur yessaweḍ ara ad yezger,
Yesselqef, immut di ttnaṣif.
Bab-is yessuyes ad t-yenher,
Yegguni-t, yebla-t wurrif.

Yuzzel-d γer γur-sen yiwen,
Ma yella kra ara iεiwen ;
Wi icqa anwa-t wi t-ilan.
Seg wayen id-walan wallen,
Galεum i wid d-isellen
Mi d-neḥka ayen yellan.

Seg wayen id-neḥka ad nefhem
D akken yal wa di ddunit
Si kra n wayen ara yexdem
Rray, yelha ma iwzen-it.
Aεaned ur iwulem;
Tikwal d aḥbib n twaγit.

Jean de la Fontaine
T. Lounès Amziane

Ґret : Tadyant n sin yiserdyan (taneqqist) - Jean de la Fontaine