Laɛyud (asefru) - Haddouche Abdellah

Laɛyud

Sani akka ay nettmurud
Mi ⁱɣ nesren laɛyud
Nettemlil-d timerẓuga
D nekkni i yeǧǧa usekkud
Di ṭṭlam nesferfud
Fell-aγ ẓẓayet ttɛebga
S yidles abeṛṛani i ncud
Seg-sen i nerǧa afud
Iwakken a^{d a}ɣ-cebḥen tasga
Axxam iγ-d-ǧǧan lejdud
Yerreẓ-as ṛṛef d lqeṛmud
Teγli tgejdid d yejga

Amγar-nni and^a iyⁱ-ⁱsuref
S ubernus ay t-nwulef
D tγellayt-is γer lkanun
Tayuga-s mi tt-yesseɛlef
S tgersa ijebbed aḍref
Deg ufus-is yerra lmaɛun
S tezmart-is i yeṭṭef
Icaḍ neɣ yequrref
Yexdem ula γef umeγbun
Tura tarwa-ines tekref
D ilemẓi yenzef
Yettraǧu a^{d a}s-d-yefk lqanun

Anda yella baba amγar ?
Akked iγuraf yenǧar
Yerra tisirt deg ubraḥ
Nneɛma d yirden deg ucekkar
Yexdem adrar azaγar
Yeẓẓul tafejrit ssbaḥ
Xas d arkasen i yezzuγer
Yefka-as ammud i lefjer
Yumen s Rebbi d ṣṣellaḥ
Tura taferka tettγar
Nesnuzuy ula d asγar
Di tmura medden yenǧaḥ

Anida-ten akk yemγaren
Wid-ak i yettleqqimen
Yesnen azal uẓebbuj
Refden afḍiṣ sserbaḥen
S tuẓẓal d yeskiwen
S wedγaγ bnan lebṛuj
Yal tamγart s ifeggagen
Taruka, taduṭ yelmen
Aẓeṭṭa irkul d agerruj
Ma d tura ifadden qqersen
Nerra iman nneγ nessen
S wawal necba aṛjuj¹

Anda-^tent lxalat iɛerken ?
Aḍajin yers γef yenyen
Timaḥremt n teγṛist γef umzur
Grent taḥnunt yeqquren
Seksu s zzit d ibawen
D tiwizi i ggant i uzemmur
Xas s weqbab d yeqbaben
Suṭḍent diγen igujilen
Axxam icuba s aggur
Tigi s dheb d imeqyasen
Rnant lbus iṛumyen
Lfuḍa tekkes γef uzagur

Anwa i d Haddouche Abdellah ?
        Haddouche Abdellah ilul ass n 06/05/1971 deg agarsafen (taγiwant n at yeǧǧaṛ), anda yettidir ar ass-a. Di tazwara yella icennu, yeṭṭafar icennayen nneγ imeqranen am ait menguellet, yaḥyaten, ...
Asirem-ines n yimir-n d akken ad yecnu, s wakken yebda ixeddem tizlatin i yiman-is, syin id-tebda tekti n tira deg yiseggasen n 90. Yettkemmil ccna akked tira akka tura maca werǧin yesiẓreg-d ama d isefra-s ama d tizlatin-is daymi yettnadi taẓrigt ara yefken azal i uxeddim-is.

Haddouche Abdellah - amedyaz/acennay

Yeṭṭef-d tugna: Fahim.M

---

(¹) awerǧeǧǧi