Tutlayt nneɣ (asefru) - Fahim Messaoudène

      Azul fell-awen ad d-nuγal ass-a s yiwen n usefru n Fahim Messaoudène yecna ucennay "Yufitren". Mass Fahem yeqbel ad d-yaru deg ublug-nwen n tsekla sin wawalen γef usefru-agi-ines ara tafem di taggara n umgarad-agi.

Xas ma ad tḥebsem ṣṣut-iw
Mazal ! ad yeqqim yiles-iw
Iles tadyant ad tt-yeḥku
Xas ma ad tgezmem iles-iw
Mazal ! Ad yeqqim ufus-iw
Afus tikti ad tt-yaru
Xas ma ad tgezmem afus-iw
Mazal ! Ad yeqqim uḍaṛ-iw
Aḍaṛ abrid ad t-yelḥu
Xas ma ad tgezmem aḍaṛ-iw
Mazal ! Ad yeqqim uẓaṛ-iw
Anza-s lebda ad yettsuɣu.

Xas ad tcergem idlisen
Ad temḥum akk iḍrisen
Awal deg yimi ad yeqqim
Xas ma aɣ-tekksem allalen
Nesɛa allaɣen d iɣallen
(ɣe)f tutlayt-nneɣ ad nefk idim
Mazal-aɣ nesɛa ifadden
Idammen nneɣ rekmen
Nbedd ass-a, mači neqqim
Mazal ttlalen-d yelmeẓyen
Yeṭṭfen deg wansayen
Di tsuta tettleqqim

Xas tqelεem akk imɣan
Mazal qqimen-d iẓuṛan
Nella iḍelli, ad nili ass-a
Amezruy nneɣ azedgan
Yedder d leqṛun iban
Seg wasmi id-tebda talsa
Xas ma yebḍayaɣ zman
Idlisen fell-aneɣ uran
Ar ass-a mazal tilisa
Tutlayt nneɣ ṭṭfen yezlan
Tedder, tedda d wussan
Fell-as nṛebba tasa

Kkset tayri i yelmeẓyen
Ternum cna i yifennanen
Tenfum akk widen yeɣṛan
Rret ɣer lḥebs ineɣmasen
Tebrum-d i yemcumen,
Teɣzem aẓekka i yizerfan
Imi iɣ-id-tettawḍem s ixammen
Mazal ad azlen idammen
Ad neffeɣ ad nsuɣ deg yiberdan
Ad twalim s wallen nwen
Mi ara d-nezzi s aqerruy nwen
Ad aken-neqlaɛ seg yiẓuṛan

Awal n umedyaz γef usefru-ines:

      Uriɣ-t deg useggas n 2008, bdiɣ-t dɣa rriɣ-t di rrif, ttuɣ-t akk. Syinna sneɣ yiwen ucannay, isem-is “Yufitren”, yessuter-iyi-d kra isefra akken ad ten-yecnu, yefka-yid kra isental, dmeɣ ttnadiɣ-d anwa ara s-fkeɣ, alarmi d-mlaleɣ d usefru-agi “Amennuɣ”, ufiɣ-t ziɣ ur tekfiɣ ara s tira. Tɛeǧb-iyi tekti-nni, nniɣ-as ilaq ad t-fakeɣ, akken kan di lḥamu-nni…
      Uzneɣ-as-t i Aḥsen (Yufitren) akken kan ad t-iɣer, acku ur iyi-d-yessuter ara asentel yecban wagi, netta yesuter-iyi-d, isefra ɣef tmetti, ɣef yinig akked ddunit…
      Asmi t-yeɣra iɛeǧb-as, yenna-yid :
-Bɣiɣ ad t-cnuɣ.
Rriɣ-as, nniɣ-as :
-Ma yella iɛeǧb-ik, cnu-t.
       Azekka-nni kan yerra-iyi-d s lexbaṛ, yenna-yi-d :
-Asefru-nni ggiɣ-as aẓawan.
D ayen iyi-sfeṛḥen nezzah, imi ula d nek yahwa-yi usefru-nni, imi d asefru id-yeɣen seg iẓuran-iw, d acu kan netta yenna-d ad as-fkeɣ izwel “Tutlayt-iw”.
Rriɣ-as, nniɣ-as :
-Semmi-as akken tebɣiḍ.
       Yiwwas yessawel-iyi-d yenna-yi-d :
-A Fahim, asefru-nni “Tutlayt-iw” iyi-d-tefkiḍ, tetḥeqqeḍ belli inek ?
Wehmeɣ d acu yebɣa ad iyi-d-yini, rriɣ-as nniɣ-as :
-Lukan mači inu, ayen ara k-tin fkeɣ...
Dɣa nniɣ-as :
-Ayen aɛni asteqsi-agi, yella win ik-d-yennan inu ?
Yerra-yi-d, yenna-yi-d :
-Ih, d yiwen n wemddakel-iw iyi-d-yennan belli asefru-agi d yiwet n tezlit n ucennay "Ulaḥlu".
Nek lliɣ yakan selleɣ i ucennay-agi, “Ulaḥlu”, d acennay i ḥemleɣ s tuget, dɣa nniɣ-as :
-Ihi, ini-as ad aɣ-d-yefk tizlit-agi, ad as-nsel…
Di taggara ameddakel-agi n Aḥsen (Yufitren), qqeṣreɣ-d yides, yenna-iyi-d :
-Ala ɛawdeɣ sliɣ-as ufiɣ-d belli mači n ucennay “Ulaḥlu”, yewwi-yi-d kan ṛebbi am akken siliɣ-as yakan.
Dɣa yuɣal Aḥsen (Yufitren) yesekles aḍebsi-ines, u yeffeɣ-d deg useggas n 2011, di tezrigin n IZEM Pro, ass-a aḍebsi-agi yettnuzu di tmurt nneɣ.

     Rğut azekka tadiwennit akked umedyaz-agi. Sya ar ass-nni tzemrem ad terzum γer ublug-is dagi. Afem immuden n isefra n Fahim.M di Temkarḍit nwen deg weḥric "Tamedyazt" dagi.