Yennayer d ass amenzu deg tfada1 n tfellaḥt seg umezruy aqdim γer yimaziγen di yal tama di Tefriqt n ugafa. Iqubel-d amenzu n “Janvier” deg tfada Julien i iwexxren ass-a s 13 n wussan γef tfada grégorien. D ayen ara yerren amenzu n Yennayer ad d-yezdi d 14 Janvier. Yella-d leγlaḍ n sin n wussan si leqdic n tdukliwin tidelsanin tiqdimin yekkaten ad yidir wansay-agi. S waya ṭṭfent deg wazemz n 12 Janvier d amenzu n yennayer.

Kra seg umezruy :
       Deg useggas n 1968 L’Académie Berbère teεreḍ ad tesserked deg umezruy « Zzman amaziγ », akken yella zzman amasiḥi d zzman n tneslemt. Tazwara-ines ad tili di tγerma n Maṣer taqdimt, asmi agellid Cacnaq amezwaru yuγalen d agellid seg iferεunen n Maṣer yesbed tawacult n udabu tis 22. Syin iḥeṛṛ-d tamurt n Filiṣṭin, yesdukel Maṣer deg useggas 950 qbel S.Σ. Si Jerusalem, yewwi-d akk uraγ d igerrujen n leqṣer n Sulayman. Tadyant-a temmeslay-d fell-as maḍi la Bible.

Imensi n yennayer di tmurt n Leqbayel :
       Imensi i ttheggin ilmend n yennayer d imensi n lwacul igerzen yifen wiyiḍ. Ggten deg-s izumal i ssexdamen akken ad qaṛṛεen laẓ, ad gerrzen tudert γer zdat, ad qablen akken iwata iεessasen s wayes ttamnen leqbayel. I uheggi n yimensi, leqbayel ssexdamen aksum n yiyuzaḍ iwumi rennin tikwal acedluḥ iwakken ad yiẓiḍ ugar seksu. Agad yesεan sbanayen-d rrebḥ-nsen imi zellun ayaziḍ i yal aεeyyal. Ayaziḍ i weqcic, tayaziḍt i teqcict. Di kra n tamiwin ttmuddun ayaziḍ d tyaziḍt i tmeṭṭut ma tella s tadist iwakken d aqcic ara d-tesεu.
      Imensi n yennayer yettiγzif yerna yesdukul tawacult. Deg-s ttarran γer yidis amur n tullas izewğen, srusun γer yiriwen n tbaqit tiγenğayin i tent-id-iṣuḥen akken ad d-beggnen belli llant. Iεessasen n wexxam daγen srusuyen-asen amur-nsen γef umnar neγ γef tessirt neγ tama n lğedra n tzemmurt. Ma yella uẓeṭṭa, tteksen-t uqbel ad d-yaweḍ yennayer ma ulac ad rfun iεessasen, ad xerben lexyuḍ-is. D ayen yellan d yir lfal.

Insayen :
     Amenzu n Yennayer ara d-iḍefren talalit n uqcic γur-s azal d ameqqran. Bab-as yettqerric-as i wegrud i tikkelt tamezwarut. Yerna yettaγ-d ilmend n tegnit-a tayuga n yezgaren. Wagi d lfal iwakken agrud-nni ad yuγal deg temγer-is d ameqqran n taddart. Agrud-nni ttawin-t daγen ad yexdem tasewwiqt tamezwarut.

Amziane Lounès

Seksu n umenzu n yennayer


(1) calendrier