Talsa i bγiγ (asefru) - Malek Houd
Talsa i bγiγ
Yiwen wass deg wussan n tefsut
Ddmeɣ-d ul n talsa
Ssurgeɣ-d seg-s
Kra n lkerh yesɛa
D lkerh ijemden
D aberkan am yiḍ
S tmara i yeffeɣ s tzuliɣt n zzman
Ul iwumi d-yeggra cwiṭ n tayri
Ssurgeɣ-as diɣen tayri almi yettenfal
Talsa merra
Tuɣal d leḥmala
Ala aḥemmel kan i tessen
Ul n wuccen imi ur t-id-ṭṭifeɣ ara
Yeqqim yeččur d tixidas d tɣeccact
Talsa, tessebleɛ-itt tayri
Tuɣal bezzaf telha
Terra-tt leḥmala d tayeḍ
D acu ara s-geɣ i wul
Yessnen kan ad yeḥmmel ?
Ddmeɣ-t-id tikkelt-nniḍen
Rriɣ-as snat n tmiqwa n lkerh
Yuɣal seg wass-nni
Ur iḥemmel ara kan…
Ur ikerreh ara kan…
Ikerreh cwiṭ, iḥemmel aṭas.
Rğut di kra n wussan tadiwennit akked mass Malek anda ara d-nejbed aṭas n temsal (axeddim-is, imal n tmaziγt, "le cyber blogging" amaziγ, ...). Sya ar ass-n tzemrem ad terzum γer ublug-is dagi
I wakken ur awen-yettruḥu kra seg umaynut n ublug nneγ tekkit dagi