Yiwet n temγart deg usatec !

      Yiwen n wass yiwet n tmeṭṭut teḥbes deg yiwen n usatec¹. Tεedda γer win iserbayen tessuter yiwen n usekkif², syin terra γer yiwen umkan anida teqqim γer ṭabla, weḥd-s. Twala d akken messuset cwiṭ, tekker, tṛuḥ ad d-teddem tissent dγa tuγal-d γer wemkan-is, meεna hat-an tufa yiwen n uberkan yeqqim ay tett asekkif-is s ṭṭmana, taγenǧayt daxel n tqellalt, itett deg-s s ttawil kan.

"Uh ! Yezmer wergaz-agi ! Yerẓa tilisa n tugdi d leqder ! Ad as-mleγ amek tegga leḥdaqa nekkini !"

Teqqim γer tama-s, dγa teǧǧa-t ad yečč cwiṭ seg usekkif-is. Tejbed-d taqellalt-nni γur-s, teṛma tiflewt-is ula d nettat deg usekkif-nni, ula d nettat tettnadi ad tebḍu yid-s tuččit-nni. Aberkan, yejbed-d γur-s taqellalt-nni, allaγ yerked, ikemmel učči s ttawil. Tameṭṭut tejbed-itt-id γur-s, amzun akken tebγa ad tt-id-tawi i wakken ad tečč amur-is. Dγa akken i kfan taḥelwiḍt-nni. Ihi aberkan-nni yekker, yewwi-d cwiṭ n lbaṭaṭa, ibḍa-tt netta d tmeṭṭut-nni. Mi fukken, msellamen, meysaramen lehna. Dγa tameṭṭut tekcem γer texxamt n waman. Mi d-tuγal, truḥ ad d-teddem aḍellaε-is i wakken ad truḥ, maεna ur tufi-t ara γef ukersi deg teqqim.

"Ah ! Ẓriγ ilaq-iyi ad ḥadreγ iman-iw seg uberkan-nni !"

Tsuγ, tesnezh-d akk asatec-nni: "amaker ! amakar !" Medden akk ttnadin γef uḍellaε-is i ufan di ṭabla tayeḍ, anida tella tqellalt-nni n usekkif i yuγalen d asemmaḍ. D yiwen n usekkif ur yennul ula d yiwen.

D nettat kan iwumi teεreq ṭabla-ines ! Ma yella d aberkan-nni, yefreq imekli-s yid-s.

"Mi ara nemmuqel alebεaḍ, nettwali kan azgen seg-s"
-Anzi-

Tasuqqilt : Murad At Weḥmed
Tanemmirt daγen i Fahim iγ-d-igerzen tasuqqilt n wenzi-agi.

---

(¹) restaurant (²) soupe