Yiwen n usefru n Ait Slimane Hamid. S usefru-agi ihi ara nini i Ḥamid ansuf yis-k γer ublug n tsekla. Tura tzemrem ad tafem ungal yura Ait Slimane Hamid "tawenza" di Tamkarḍit nneγ (aḥric "ungalen"). Rğut selazekka tadiwennit akked mass Ḥamid anda ara d-nejbed aṭas n temsal. Sya ar ass-n la nettrağu iwenniten nwen.

A wid itt-yettedεan ɣef waman
I yixef ma ad yerεiεec ?
Iṭij deg igenni yeγman
Yeswa-ten mebla askerwec
Xas yeγba wayen yellan
Wis ma s leγẓaẓ d ukerrec
Ma d nekk idehmen ussan
Yeqqel-iyi unadi d asfedwec

Nadi neγ qqim
Wali neγ anef
Innig deg ubrid nettexmim
Hat d asxuref

Taγart n weglim tewεer
Ay at usekud yettwalin
Temuɣli leɣza lebḥer
Tenneḍ-as i yigli akkin
Aslaf mačči d asteɣfer
Ljiḥ mačči deg teḥdayin
Win yesεan lhiba ad teṣṣer
Wayeḍ yedda d tiryalin

Illi-k dagi
Neɣ illi dihin
Ayen akk yeḥbes yiẓri
D tixnanasin

Ay aseknef id-ileḥun
A leɣban ɣef tmizar
Zzit iɣunzan aḥḍun
Yesmirjiḥ ɣef lεinṣer
Ma cehwan-tt wid id-iqeḍḍun (iqeṭṭun)
S ṭmaɛ is-ggan sser
Yensa lebɣi yedduxun
Targit yid-s teferfer

Σebbi neγ anef
Ruḥ neγ uγal
Ddunit tecfa ɣef useglef
D timcukal

A tagelda n tatut
A tiγremt n lemḥayen
Ma yettinit yixef n tmeṭṭut
Yules-d lebɣi mertayen
Win yenwan teddel-it tagut
Aman fell-as i maren
Win yenwan yeffeγ tagut
Aman di tfekka-s kkawen

Xiḍ neγ seγres
Sizdig, simes
Lxiḍ anda akken yeqres
Din i teḥbes !

Asfedwec - asefru n Ait Slimane Hamid