Isefra n tayri - Sεid At Mεemmer
Tlata isefra n Sεid At Mεemmer i wen-d-nefren, nessels-asen tugniwin icebḥen. Nessaram ad awen-εeğben. (Tekkit γef tugna akken ad d-timγur)
Ad xsint akk teftilin
Ad aγent kan tcemmaεin
Si Muḥ ad aγ-d-yecnu
Γur-i ad d-teẓẓleḍ ifassen-im
Dγa nekk ad d-bedreγ isem-im
Aqerru-w γur-m ad n-yeknu
Itran sennig nneγ ur d-gerrin
Swadda ad aγ-d-ttwalin
Leεyaḍ ulac ansi ur as-d-slin
Si Muḥ s ttawil kan i icennu
Azekka-nni mi ara d-naki
A d-naf mazal-aγ deg igenni
Dγa ad nernu ad nemyeẓmaḍ
Ccna n Si Moh yexsi
Taqeffalt ad tt-nsami
A d-yenṭeq diγ war leεyaḍ
Ad nuγal γer turart-nni
Ad as-d-nales i wayenni
Awer yili d lğar walbeεḍ
Ur lliγ d Ḥmed umerri
Maca, tagi d tayri
Anef-aγ ad nezzi ad nenneḍ
Sεid At Mεemmer
Lemmer ad qqleγ ad ẓreγ udem-im
Yir awal-agi ad iyi-d-yenser:
Ttxil-m err akin allen-im
Anef i wul-iw di liser !
Sεid At Mεemmer
Nekk yid-m nγawel
Γer tafat ad taγ
Nsuγ nessawel
Nekcem amadaγ
Eğğ-aγ negrareb
anda ara d-naf abrid !
Ma neqqim nesleb,
Yak d ul ur nerkid ! (...)
Nekcem s aẓekka
Nenṭel iman nneγ
Nwala-d azekka
Amek ara yeffeγ
Necḍeḥ γef wagu
Di leḥmuregga
I ijeğğigen n magu
Seg waggur nenǧer-d targa (...)
Tiselbi nneγ tecbeḥ
Iḥulfan ad am-inin
Deg igenni necḍeḥ
At tismin ur kem-cnin
Anef-as i tegnit
Nekk yid-m ur nessusum
Neḍsa γef zwi-tt rwi-tt
Ur nečči i yiwen aksum
Nekk yid-m, kemm d nekk
Nemyeḥmal nemyussan
Ur d-yebdid γur-i lmelk
Fkan-iyi-kem wussan
Sεid At Mεemmer