S lferḥ d ameqqran id-nemmuger Taskelmuḥyet. Ilmend n umulli-agi nerna-d yiwet n teγmert deg ublug "Muḥya" anda ara d-nejmeε akk imagraden yeqqen usentel γer urgaz-agi ameqqran n tsekla tamaziγt.
   Ad tt-id-nebdu ihi s yiwen n wazzun iγ-d-yewwḍen sγur gmat nneγ Fahim.M. Tagi d yiwet n tneqqist (inédite) yura-tt "Escope" yerra-tt-id Muḥya γer tagi nneγ (ulac-itt di tesfifin-is). Yenna-aneγ-d gmat nneγ Fahim belli d yiwen n umeddakel-is is-tt-id yuznen uqbel ad yemmet Muḥya. Attan ihi γur-wen (s usirem ad tt-nwali ussan id-iteddun s talγa audio) :

Bu snat ur nerbiḥ yiwet:

Yiwen d argaz alemmas, yuɣ snat n tlawin.
Yiwet mecṭuḥet, tayeḍ d tamɣart.
Tamecṭuḥt-nni teqqar-as :
-"Argaz-iw bezzaf meqqer fell-i".
Dɣa mi teṭṭef kan, anda s-tufa anẓad amellal deg uqerruy-is, ad as-t-id-tekkes.
Tamɣart, nettat teqqar-as :
-"Argaz-iw bezzaf mecṭuḥ fell-i".
Daɣen nettat anda tufa anẓad aberkan deg uqerruy-is, ad as-t-id-tessencew.
Tin tettak-it i tin armi t-rrant d afeṛḍas.

Bu snat ur nerbiḥ yiwet (taneqqist) - MuḥyaAzwel amezwaru n tneqqist-agi
"D'un homme qui avait deux Femmes"