Azul fell-awen ass-agi ad awen-d-meslayeγ γef yiwen n wungal id-yeffγen deg useggas n 1983, i γriγ ussan-agi iεeddan. Wagi d "askuti" yura Saεid SEΣDI. Ma yella win deg-wen i yuran tameddurt (biographie) n umeskar ad aγ-tt-id-yazen akken ad tt-id-nerr dagi. Win yesεan kra n tmawat, akken tebγu tili, ilaq ad aγ-tt-id-yini mebla akukru. Mebla ma εeṭṭleγ fell-awen ad aken-ğğeγ akked wungal-agi.

Askuti (ungal) - Saεid SEΣDI (said sadi)Askuti
Saεid SEΣDI
184 n (y)isebtar
Taẓrigt tamezwarut γer IMEDYAZEN PARIS - 1983

 

Agzul :

       Asebtar deffir wayeḍ ameskar yeẓda-aneγ-d tidyanin n Meẓyan. Di tazwara ad nissin Meẓyan-nni yesεan 17 iseggasen. Wagi ad yeğğ leqraya-s deg useggas n 1956 akken ad yali γer umadaγ. Umbeεd azarug ad d-yaf iman-is weḥd-s (imi aṭas seg imeddukal-is i yemmuten) rrif n yiwen seg watmaten-is n umadaγ itt-yerran i tissit. Ad d-yemlil daγen akked Ḥsen At Sadeq i iruḥen γer Tunes, i yuγalen d ayen yuγal. Imir-n ad d-yaf iman-is, nnig lebγi-s ahat, ixeddem akked imsulta. Din ad yili d anagi n lbaṭel. Di tazwara ad t-iγunfu, ad ibγu ad d-inṭeq dγa ad yuγal γer deffir. Akken kan armi yuγ tanumi yuγal ittekki ula d netta. Axeddim-agi ad as-yerwi tudert-is, ad tt-yerr i tissit, ad as-iseftutes assaγ gar-s d baba-s, ad t-issebεed γef wat taddart-is. Akka armi d asmi ara d-taweḍ tefsut imaziγen, din ad d-yemlal akked watmaten-is dγa ad d-ldint wallen-is. Ad εeddin wussan, Meẓyan ad yemlil akked Malḥa (yiwet n tmeγnast). Malḥa ad tt-refden, ad iεeddi fell-as lbaṭel amzun akken d lxir is-ttarran i Meẓyan.

Askuti (ungal) - Saεid SEΣDI (said sadi)

 

Awal-iw :

       Deg wayen yerzan tira, d tira xfifen yezmer ad tt-yefhem yal yiwen. Daγen ur txus ara deg usaran1. Griγ tamawt di tazwara ameskar yextar ad d-yemmeslay s wudem 1 ma deg isebtaren ineggura yemmeslay-d s wudem wis 3, ahat aya yezmer ad irwi ameγri. Awadem-nni n "Popeye" yeğğa-d deg wallaγ ccama d tameqqrant : “Acu n taγect id-yeffγen si teslent am tin: d tazemmaṛt-nni xeddmen warrac s texlulin."
       Ayen yelhan deg wungal-agi daγen imi neẓra lbaṭel si berra nerna neẓra-t si daxel. Di tazwara nwala amek yerra Meẓyan lbaṭel d taxbizt-is, amek it-iwalef cewya cewya, amek is-iḥulfa, amek yedder yides. Di taggara nεac akked Malḥa tignatin-nni anda tettwaḍlem, anda is-ksen sser, anda i tεedda gar ifassen n "Popeye". Am useklu-nni is-yennan i tgelzimt: “afus-im seg-i”.

Askuti (ungal) - Saεid SEΣDI (said sadi)Asebter 93

Tukkist :

      Ґef zelmeḍ ixxamen n Buluγin mzuγaren rrif rrif n webrid, wa yeṭṭef di lḥiḍ n wa ugaden ula d nutni. Kra deg-sen mazal bedden, llan wiyiḍ tečča-ten tewser. Wa yeqqim mebla ṭṭaq n berra, wa yeskan-d seg-s kra n tlajurin am userwal bu tfawet. Wissen ayen akka nettwet armi tuγal ccbaḥa n tiṭ d asafar. Ixxamen-agi tura mači d menwala iten-izedγen. D ixxamen id-ğğan ikulunen. Wid iten-yeṭṭfen ass-a diγen d imεelmen n tmurt. Mači d adrim iten-yeṭṭfen. Ad tkecmeḍ γer daxel, kra n učenčun id-iffγen di Fṛansa ad-t-in-tafeḍ din.  -Asebter 91-

      Terfed-d iman-is, tsenned s yiγil-is di tsumta, tsers aqerruy-is deg ufus-is, tmuqel-it. Iṭṭes, d iḍes n wegrud. "Mazal-it meẓẓi, ur as-tettakeḍ ara rebεin. Isεa sser". Ґer yemmas id-irra, is-yenna imi is-d-iḥekku nnuba-s. "Ad tafeḍ mači akka ussan-agi... Muqel kan tamart-is, γas xiḍ yes".”  -Asebter 128-

 


Awalen :
(1) humour